Friday, August 22, 2008

#1


gikawat sa gahukas nga birhen
ang sista ni jimi hendrix.
mipungko siya sa inidoro,
gikaskas ang tuno sa international.
mihuy-ab ang pughawng iring
ug gibitad niya ang dila niini,
dayon gi-bra sa iyang tutoy
nga nakalimot pagpamukol.
mingaab ang iring hinungdan
sa kalit nga pagkasinsiyo
sa bombilya sa kasilyas.
ug ang kangitngit daw butakal
nga miungad sa iyang dughan.
sa gibating kakulba, galaom
ang birhen nga manamkon
unta siyag kaluhang anghel
aron ang mga paku niini
madalit niya kang daedalus.
apan wa damhang mibuhagay
ang iyang regla nga gitinta 
karon sa balakerong suryalista.




#2


dihang gihagkan sa tiki
ang ngabil sa yuta,
miulan ang langit
og buwad bulinaw.
ug gihubo sa retiradong anghel
ang ginansilyo niyang paku
ug gisab-it sa antina sa tv.
ang mga buwak utot-utot
nga nanuksok sa iyang taghoy
gilibak sa biyudong dunggan.
dunay gidiktar ang ngisi
sa hanging mihasmag
sa nangunot niyang aping.
sa unahan, nalantaw niya
si sisyphus nga nakig-inom
sa estatuwang tambaloslos.
nganong sa iyang paghinuktok
mamuwak man og tansan
ang iyang bulbol ug bungot?




#3


katag pa sa tae sa kanding
ang hunahuna ni lolo.
ako ning gisilhig, gidaspan,
gibutang og balik sa iyang ulo.
nakabuhi man gud ang iyang kabaw
nga gipatuna niya sulod
sa garapon sa amahong.
ug sa iyang pagpangita
nawad-an na siyag paglaom
tungod gidagit sa tagulilong.
maong gihipusan usa niya
didto sa among payag
ang gipangkaang niyang uma,
ug minghoyng mihigda sa lantay.
sa hinayhinay, gihuyop ko
ang gaawop niyang mata.
way tiaw nga nabagtan ko 
ang nawani niyang kabaw
nga nanibsib sa mga damgo
namong gipangmaleta.




#4


kaganiha
ang kadlawon
gisakay sa ambulansya.
nangasaag
ang mga hubog
nga tun-og
didto sa kusina
ug nanyansing
sa usa ka panaksang
tinughong.
ang nanagbilar
nga mga dila
tabon sa tirmos
gibuldoser sa
parayeg sa ginamos.
matud pa sa duha ka
gabayleng ok-ok:
“ang gugma karon
angayng istipleran
og chicharon aron
mokagumkom.”




#5


nabalaka si inday.
natulon niya
ang gigukod nga iring
nga nanghungkab sa kusina.
nasangit pa gyud ni
sa iyang tutunlan
nga nalingawg pagpangawras
sa mga ulo sa buwad
nga nasablay sa iyang ubol-ubol.
atol pa gyud nga way tubig
ang mga galon ug tadyaw
kay gisudlan kini
sa natughit nga mga bangaw
sa iyang mga manghod.
maong napugos ko pagsigpu
sa naghapa-hapang daynasur
sa akong pahak
ug giitsa ngadto kaniya.
tungod sa iyang kalisang,
nautot niya ang iring,
apan nalamoy sab niya
ang daynasur apil
ang akong kasingkasing.




#6


gisulod kog sobre
ang akong ngisi
ug gitunol ngadto
kang mercy.
giablihan niya kini
ug gitaktak sa tasa.
giipisag ininit tubig,
gibutangan og lima
ka kutsaritang kape.
unya gikutaw niya
ug paspas gilad-ok.
miduol siya nako
dayon mingisi:
“dong, giatitud lagi
ning akong dughan….”




#7


ang haya ni tiyo b
kay sama og burikat
nga mibilangkad
sa mamords
niyang paa
aron ipakita
nga wala siya
mamanti

kay ang garter
sa iyang panti
maoy gitugot
sa tabanog
niyang gusok
nga giugom sa
panganod




#8


mor pa. kini ang nahitabo:
way koneksyon ang pagpanghunaw
ni cardinal ______ og red horse
sa pagpas-an ni jesus sa poste sa kuryente
padulong sa ikatulong andana sa robinson’s.
mga dinakpang traysikad sa citom
ang gibunal-bunal sa iyang bukobuko
human siya purung-purongi
sa letrang “m” sa mcdonald.
dayon giwelding ang iyang mga kamot
ngadto sa kinatas-ang poste sa veco.
mihangad siya padulong sa cebu plaza
ug miingon: “paimna kog bahal….”
isip ulahing utong, namulong siya:
“amahan, pasayloa sila. wa sila masayod
kung asang dapita ang mambaling.”
nikirig siya, namatay ug gilubong.
pagkatulo ka adlaw, nabanhaw siya
ug misaka sa m/v sugbo —
milayat ngadto sa nagtampusisok
nga mga batang muslim nga nanalom
sa giitsang mga sinsiyo.




#9


ang
estrayp
nga
mga
buwak
nga
nangudlot
sa
imong
kilay
niadtong
dail
sa
agosto
gilabni
sa
kabakaba
kong
mata.
gitan-ugan
sa
minteryong
dughan
human
kini
latayi
sa
rolyong
tisyu.




#10


usa na ka lung-agan
ang ki-ki sa akong ngipon.
ako ning gikislan,
human gibalik og paniudto.
duha na man gud ka semana
nakong gimemorays
ang akong kaon.
gisud-an na lang gani nako
ang hilaw nga bunga sa kamatis
nga mitubo sa gakwintas
nga buling sa akong liog.
ug dihang gibugno ko ang plato,
pwerteng panilap
sa vegetarian kong iring.
apan ako lang kining
gihungitan sa talinis kong tutok
hangtud nalumos kini
sa gatulo niyang laway.
miundang ko nga gakombo
sa butirik kong tiyan
samtang gikwadro ko
ang pahiyom sa kalabirang buwan.